पोखरा महानगरपालिकाका मेयर धनराज आचार्यले ५४ औं विश्व वातावरण दिवसको अवसरमा विद्यार्थीहरूका लागि बिरुवा रोप्ने विशेष प्रयोगात्मक प्रतियोगिताको घोषणा गरे । पोखरालाई हरित र स्वच्छ बनाउने अभियानअन्तर्गत महानगरभित्रका विद्यालयमा अध्ययनरत विद्यार्थीहरूलाई लक्षित गर्दै उनले यस्तो आह्वान गरेका हुन् । यस प्रतियोगितामा उत्कृष्ट हुने विद्यार्थीले नगद पुरस्कार र विद्यालयले प्रशंसापत्र प्राप्त गर्नेछन् ।

प्रतियोगितामा सहभागी हुन चाहने विद्यार्थीले आगामी ३० जेठसम्म आआफ्नो विद्यालय परिसरमा कम्तीमा २ वटा बिरुवा रोप्नुपर्नेछ । बिरुवा रोप्दै गरेको प्रक्रिया समेटिएको २ वटा फोटो र अधिकतम १ मिनेटको भिडियो खिचेर पठाउनुपर्ने नियम महानगरले तय गरेको छ । विद्यार्थीले आफूले रोपेको बिरुवाको नाम र त्यसको उपयोगिताका बारेमा २ वाक्यमा खुलाएर पठाउनुपर्ने आचार्यले बताए ।

यस प्रतियोगितामा प्रथम हुने विद्यार्थीले २५ हजार रुपैयाँ नगद पुरस्कार पाउनेछन् । त्यसैगरी दोस्रो हुनेले २० हजार रुपैयाँ र तेस्रो हुनेले १५ हजार रुपैयाँ प्राप्त गर्ने मेयर आचार्यले जानकारी दिए । ‘सबै विद्यार्थीहरूको सक्रिय सहभागिताले पोखरालाई हरित र स्वच्छ बनाउने अभियानमा बल पुग्ने हाम्रो अपेक्षा छ,’ उनले भने ।

—