जापानको टोकियोमा रहेको एक पसलबाट चोरी भएको झन्डै २ लाख ९० हजार अमेरिकी डलर अर्थात् ४ करोड ३९ लाख रुपैयाँ बराबरको स्वीश लक्जरी घडी हस्तलिखित माफीपत्रसहित फिर्ता गरिएको छ ।

स्थानीय सञ्चारमाध्यमका अनुसार घडी चोरी भएको एक हप्तापछि पसलमा प्याकेजमार्फत फिर्ता पठाइएको हो ।

ग्राहक बनेर पसल पुगेका एक व्यक्तिले अडेमार्स पिगुएट ब्रान्डको घडी लगाएर हेर्ने क्रममा आफ्नो नाडीमा राखेपछि पसलबाट भागेका थिए । तर चोरी भएको घडी भएको प्याकेज र त्यससँगै ‘माफ गर्नुहोस्’ लेखिएको हस्त लिखित नोट पसलमा प्राप्त भएको हो ।

घडीको सिरियल नम्बरमा आधारमा त्यसलाई चोरीको वस्तुका रूपमा पहिचान गरिएको हो । टोकियो प्रहरीले चोरीमा संलग्न भएको आशङ्कामा व्यक्तिको खोजी गरिरहेको छ ।

यसै वर्ष अगस्टमा यही शपिङ कम्प्लेक्सको अर्को पसलबाट २ करोड येन बराबरका ४ वटा महँगा घडी चोरी भएका थिए ।

—